Home मुख्य समाचार काङ्ग्रेस नेताका नामका अस्पताल विघटन गर्दै सरकार, कांग्रेसले भन्यो खबरदार !

काङ्ग्रेस नेताका नामका अस्पताल विघटन गर्दै सरकार, कांग्रेसले भन्यो खबरदार !

186
0
SHARE

काठमाडौँ, ३० पुस । प्रमुख प्रतिपक्षी दल नेपाली काङ्ग्रेसले वर्तमान सरकारले आफ्नो पार्टीका नेताका नाममा स्थापना भइसकेका अस्पताल विघट्न गर्न खोजेको भन्दै गम्भीर ध्यानाकर्षण भएको जनाएको छ ।

नेपाली काङ्ग्रेसका वरिष्ठ नेता रामचन्द्र पौडेलले सोमबार आकस्मिक पत्रकार सम्मेलन गरी सरकारले काङ्ग्रेसका तत्कालीन सभापतिद्वय एवं पूर्वप्रधानमन्त्रीद्वय स्व. गिरिजाप्रसाद कोइराला र स्व. सुशील कोइरालाका नाममा स्थापित अस्पताल विघटन गर्ने प्रक्रिया अघि बढाएको भन्दै आपत्ति प्रकट गर्नुभयो ।

तत्कालीन सरकारले स्व. गिरिजाप्रसाद कोइरालाका नाममा तनहुँमा श्वासप्रश्वास र बाँकेमा स्व. सुशील कोइरालाको नाममा क्यान्सर अपस्ताल खोल्ने निर्णय गरी दुवै अस्पताललाई मुलुककै प्रतिष्ठित र सुविधासम्पन्न बनाउने गरी विस्तारको प्रक्रिया अघि बढाएको थियो ।

मुलुकको शान्ति प्रक्रियाका नेतृत्वकर्ता स्व. गिरिजाप्रसादको श्वासप्रश्वासबाट ग्रसित भई निधन भएको थियो भने संविधान जारी गर्दाताका सरकारको नेतृत्वकर्ता स्व. सुशील कोइराला जीवनको उत्तरार्द्धमा क्यान्सरबाट पीडित हुनुहुन्थ्यो ।

स्वास्थ्य तथा जनसङ्ख्या मन्त्रालयले मुलुकका ११ ठूला अस्पताललाई सङ्घीय सरकारमातहत रहने गरी गठन आदेशका लागि मन्त्रिपरिषद्मा प्रस्ताव पठाएको आफूहररूलाई जानकारी आएको नेता पौडेलले दाबी गर्नुभयो । उहाँले भन्नुभयो, ‘तर, मन्त्रिपरिषद् बैठकले काङ्ग्रेसका दुवै नेताका नामका बाहेक नौ अस्पताललाई मात्र सदर गरी निर्णय गर्यो र स्वास्थ्य मन्त्रालयले ती दुवै अस्पताल विघटनको प्रक्रियामा लगेको भन्ने हामीले आज खबर पायौँ ।’

सो खबर पाएलगत्तै काङ्ग्रेस नेताहरुले प्रधानमन्त्री केपी शर्मा ओलीलाई आज भेट्न खोजेका थिए । सचिवालयले प्रधानमन्त्रीको व्यस्तताले भेटका लागि भोलि मात्रै समय उपलब्ध हुने खबर गरेको पौडेलले सञ्चारकर्मीलाई जानकारी गराउनुभयो ।

काङ्ग्रेस नेताका नामका अस्पताल विघटन गर्न खोजेर सरकारले दिन खोजेको सङ्केतप्रति काङ्ग्रेस सशङ्कित भएको बताउँदै नेता पौडेलले भन्नुभयो, ‘अब हामी प्रधानमन्त्रीको जवाफको प्रतीक्षामा छौँ, त्यसपछि सरकारको यही रबैया रह्यो र प्रतिपक्षीप्रति पक्षपातपूर्ण व्यहार गरे हामी कठोर कदम चाल्न बाध्य हुनेछौँ ।’

नेता पौडेललले कठोर कदमका रुपमा काङ्ग्रेसले सदनदेखि सडकसम्म आन्दोलन गर्ने चेतावनी दिनुभयो ।

सञ्चारकर्मीको प्रश्नमा उहाँले नेपाल वायु सेवा निगमको वाइडबडी खरिद प्रक्रियामा देखिएको अनियमितताप्रति छानबिन हुनुपर्ने माग गर्नुभयो । वरिष्ठ नेता पौडेलले निर्मला हत्याकाण्डका दोषी पत्ता नलाग्नुपछाडि सो घटनामा शक्तिशाली मान्छेको संलग्नता भएको हुन सक्ने आशङ्का व्यक्त गर्नुभयो ।

सरकार शान्तिसुरक्षा र विकासमा असफल भएको आरोप लगाउँदै वरिष्ठ नेता पौडेलले विकास निर्माणका सन्दर्भमा बनिसकेका अस्पताल विघटन गर्न खोजेर उल्टो बाटोमा हिँडेको आरोप लगाउनुभयो ।

काङ्ग्रेस हालसम्म संयमित र जिम्मेवार प्रतिपक्षको भूमिकामा सरकारलाई बेलाबेलामा सचेत गराउँदै आएको बताउँदै उहाँले आफूहरुले सरकारलाई सुझाब दिँदै आएको भए पनि नसुनेको आरोप लगाउनुभयो ।

वरिष्ठ नेता पौडेलले भन्नुभयो, ‘अब हामीले टुलुटृुलु हेरेर बस्न नसक्ने अवस्था आयो, काङ्ग्रेसको अस्तित्वमाथिको हमलाका रुपमा हामीले यस घटनालाई लिएका छौँ ।’

चिकित्सा विधेयक पनि संसद्बाट बहुमतका आधारमा जबर्जस्ती पारित गर्न खोजिए प्रतिवाद गर्ने धारणा व्यक्त गर्दै उहाँले आमरण अनशनरत डा. गोविन्द केसीका मागप्रति सरकार गम्भीर हुनुपर्ने बताउनुभयो ।

मुलुकका दूरदराजमा अस्पताल खोल्ने कुरा सरकारले नमान्नु संविधानको समाजवादको भावनाविपरीत रहेको टिप्पणी गर्दै नेता पौडेलले काङ्ग्रेसले यस्तो हुन नदिने स्पष्ट पार्नुभयो ।

LEAVE A REPLY